Herri-landaketak erakundeekin elkarlanean

Baserria KM0-rekin eta Real Sociedad Fundazioarekin-ekin batera, klimaren aldeko konpromisoa ekintza erreal bihurtu dugu. Lankidetza horiek kanpainak eta herri-landaketak abian jartzea ahalbidetu dute; ekimen horiek biodibertsitatea indartzen dute, basoaren osasuna hobetzen dute, eta ezinbestekoa den herritarren erantzunkidetasuna sustatzen dute, Gipuzkoako basoak epe luzera zaintzeko.

Baserria KM0-rekin, basoaren zaintzaren bidez landa-eremua eta herritarrak lotzen dituzten ekimenak bultzatzen ditugu. Horren adibide da "Zuhaitz bat babestu" kanpaina. Helburua ez da soilik zuhaitzak landatzea, baizik eta ondo egitea: espezie egokiak aukeratzea, toki egokietan esku hartzea eta zaintzan jarraitutasuna bermatzea, hobekuntza ekologikoa benetakoa eta iraunkorra izan dadin. Egindako jardunaldiak 200 pertsona baino gehiago elkartu zituen eta bertako haritzak (Quercus petraea) landatzea ahalbidetu zuen, biodibertsitatea indartuz, tokiko jatorria duten  materialarekin. Keinu sinbolikotik harago, esperientzia komunitarioa izan zen —jarduerekin eta jai-giroarekin—; horrek erakusten du, erakundeak eta herritarrak batuz gero, basoaren zaintza konpromiso partekatu eta iraunkor bihurtzen dela.

Real Sociedad Fundazioarekin, basoa herritarrengana gerturatzen duten landaketa irekiak eta ekintza komunitarioak aktibatu ditugu. Kirolak eta komunitate-espirituak zubi-lana egiten dute: agian mendiarekin harremanik izan ohi ez duten pertsonek parte hartzen dute, basoaren balioa bertatik bertara ezagutzen dute eta ideia xume baina erabakigarri bat indartzen dute: basoa zaintzea Gipuzkoa zaintzea da.

Ildo horretan, hurrengo landaketa otsailaren 28an egingo da Aian, Aiako Udalarekin batera; jardunaldi parte-hartzailea izango da, baso-ondarearen zaintzara herritarrak batzen jarraitzeko.